Felly am beth mae hyn i gyd?

Byddwch yn rhan o gynllunio, datblygu a gweithredu ymgyrchoedd marchnata integredig a fydd yn hyrwyddo un math neu fwy o gynnyrch eich cwmni, neu’r cwmni ei hun.

Eich nod yw helpu i wneud yr elw gorau posib trwy gynyddu gwerthiant neu gyfran y farchnad ar gyfer amrywiaeth o gynnyrch y cwmni gan ddatblygu strategaethau gwerthiant sy’n addas ar gyfer anghenion eich cwsmeriaid.

Mae’n waith amrywiol iawn a gallwch fod ynghlwm ag ymgyrchoedd marchnata ar gyfer sawl cynnyrch gwahanol ar yr un pryd.

Beth allen i fod yn wneud?

Mae eich cyfrifoldebau’n debygol o amrywio’n ddibynnol ar faint eich cwmni, ond fe welwch bod yr amrywiaeth o dasgau canlynol yn nodweddiadol i’r swydd:

• Cysylltu gyda chwsmeriaid, cydweithwyr a chyflenwyr
• Rheoli’r broses o gynhyrchu deunydd marchnata amrywiol
• Ysgrifennu a phrawfddarllen testun
• Cysylltu gyda dylunwyr ac argraffwyr
• Trefnu sesiynau tynnu lluniau
• Cynnal a diweddaru cronfeydd data o gwsmeriaid
• Trefnu a mynychu digwyddiadau
• Cyfrannu tuag at a datblygu cynlluniau a strategaethau marchnata
• Rheoli cyllidebau
• Rhedeg ymgyrchoedd marchnata drwy wahanol gyfryngau
• Gwerthuso ymgyrchoedd marchnata
• Gweithio fel rhan o dîm marchnata effeithiol

Beth fydd i’w ddisgwyl gennyf i?

Bydd angen i chi fod yn berson creadigol, ond hefyd yn hynod drefnus, yn gallu rheoli sawl prosiect gwahanol ar yr un pryd, ac mae angen meddwl dadansoddol.

Bydd angen sgiliau negodi a chyfathrebu llafar ac ysgrifenedig ardderchog a’r gallu i ymdrin â phobl ar bob lefel.

Byddwch yn gallu ymdopi â phwysau a sefyllfaeodd sy’n newid yn sydyn, ac yn defnyddio eich menter eich hun i ddatrys unrhyw broblemau – neu i’w hosgoi yn y lle cyntaf.

Bydd angen sgiliau cyfrifiadurol ardderchog, yn ogystal â sgiliau ysgrifennu a llafar cryf.

Yn olaf, bydd angen digon o fynd arnoch, a pharodrwydd i weithio cymaint o oriau â sydd angen i gyflawni’r gwaith.

Beth alla i ddisgwyl?

Byddwch wedi’ch lleoli yn y swyddfa, gyda chryn dipyn o deithio i gwrdd â chwsmeriaid a chyflenwyr ac i fynychu digwyddiadau.

Er mai gweithio 9yb tan 5yp sy’n arferol, bydd cyfnodau’n aml lle bydd angen i chi weithio y tu allan i’r oriau hyn – yn enwedig wrth gydbwyso ymgyrchoedd ar gyfer cynnyrch gwahanol.

Beth am y cyflog?

Mae’n bosib y byddech yn dechrau fel hyfforddai graddedig sy’n ennill o dan £20,000 y flwyddyn – er gallwch ddisgwyl i’r ffigwr yma godi wrth i chi ddatblygu gyrfa lwyddiannus ym maes marchnata.

Gyda phrofiad pellach, gallech fod yn ennill dros £30,000.

Pa gymwysterau ydw i angen i gael i mewn?

Fel arfer, mae gradd marchnata neu radd gyda llawer o gynnwys marchnata yn ofynnol ar gyfer rôl Swyddog Gweithredol Marchnata.

Beth am hyfforddiant pellach?

Mae amrywiaeth o gyrsiau ôl-raddedig y gallech eu hystyried un ai fel dewis llawn amser wedi i chi raddio neu ar sail rhan amser fel gweithiwr cyflogedig.

Fel arall, mae amrywiaeth o gyrsiau ar gael gyda chyrff proffesiynol megis y Chartered Institute of Marketing, er enghraifft y Diploma Ôl-raddedig Siartredig mewn Marchnata.

Efallai yr hoffech hefyd ystyried aelodaeth o gorff proffesiynol, a fydd yn golygu bod gennych bob amser yr wybodaeth ddiweddaraf o ran newyddion a digwyddiadau, yn ogystal â dangos eich ymroddiad i’r rôl.

A oes unrhyw beth arall y dylwn i’w wybod?

Oes, marchnata yw un o’r dewisiadau gyrfa mwyaf poblogaidd ar gyfer graddedigion, felly disgwyliwch dipyn o gystadleuaeth!

Fodd bynnag, mae’n werth y drafferth gan fod y gwaith yn amrywiol ac yn rhoi boddhad, ac mae cyfleoedd gwych am ddyrchafiad i swyddi uwch.